Бразилийн Рио-де-Жанейро хотноо болж буй Жүдо бөхийн насанд хүрэгчдийн 2013 оны дэлхийн аварга шалгаруулах тэмцээнд манай улсын баг тамирчид амжилттай оролцож байна. Өчигдөр тэмцээний эхний өдрийг эмэгтэйчүүдийн 48 кг-ын жинд ОУХМ М.Уранцэцэг алтан медалиар салхийг нь хагалж, эрэгтэйчүүдийн 60 кг-ын жинд ОУХМ Д.Амартүвшин мөнгөн медаль хүртэв. Мөн ОУХМ Г.Болдбаатар шагналт тавдугаар байрт шалгарснаар Монголын жүдочид дэлхийн аваргын татамид өрсөлдөж байгаа 123 орны баг тамирчдын манлайд бичигдэж байна.