Монгол Улсын гавьяат тамирчин, Дэлхийн аваргын хүрэл медальт, боксчин У.Мөнх-Эрдэнэ өнөөдөр сэтгүүлчдэд хандлаа. МОБХ-ноос түүнийг Казакстаны Алмата хотноо болох Дэлхийн аварга шалгаруулах тэмцээнд оролцуулахгүй байх бодлого барьж, шахан хавчиж байгаа аж. Энэ талаар ярихдаа, “Би олимпоос хойш олон улсын чанартай томоохон тэмцээн уралдаанд оролцоогүй байж байгаад саяхан Ази тивийн аварга шалгаруулах тэмцээнд оролцож мөнгөн медаль авсан. Энэ нь намайг бэлтгэл сайтай байгааг харуулж байгаа хэрэг. Гэтэл намайг Дэлхийн аварга шалгаруулах тэмцээнд оролцуулахгүй. Миний жинд ОУХМ З.Энхзоригийг оруулах гээд байгаа юм” гэлээ.
У.Мөнх-Эрдэнийн хувьд 64 кг-ын жинд чансаагаараа дэлхийд нэгдүгээрт бичигдэж байгаа аж. Тиймээс ДАШТ-д ямар нэгэн шалгуургүйгээр оролцох эрхтэй аж. Гэтэл МОБХ-ны зүгээс энэ жинд улсын аварга болсон З.Энхзоригийг оруулахаар зэхэж байгаа аж.
Монгол Улсын гавьяат дасгалжуулагч Г.Оюунболд энэ талаар ярихдаа, “У.Мөнх-Эрдэнэ жиндээ дэлхийн чансааг тэргүүлж байгаа. Гэтэл энэ хүнийг ДАШТ-д оруулахын тулд заавал сорилгод оролцуулна гэсэн шаардлага тавьж байна. Энэ жинд Монголд У.Мөнх-Эрдэнэтэй энэ зэрэгцэх хүн байхгүй. Тиймээс У.Мөнх-Эрдэнийг сорилгод би оруулаагүй юм. У.Мөнх-Эрдэнийн жинд ДАШТ-д орох З.Энхзоригийн хувьд дэлхийн чансаад нэрээ бичүүлж үзээгүй. Олимп, дэлхийн аваргын тэмцээнээс ямар ч медаль авч үзээгүй, нэр нь гараагүй тамирчин. Ийм байтал дэлхийд данстай тамирчинтай жишч болохгүй.
Ер нь, У.Мөнх-Эрдэнийг шахан хавчиж байгаа нь илт байгаа юм. МОБХ-ныхон хэд хэдэн улстай хамтарсан бэлтгэл хийсэн. Хамгийн сүүлд л гэхэд Хятадын шигшээ багтай хамтарсан бэлтгэл хийсэн. Гэтэл энэ бэлтгэлд У.Мөнх-Эрдэнийг авч яваагүй. ААШТ-д У.Мөнх-Эрдэнэ дангаараа бэлтгэл хийж орсон” гэв.
ДАШТ-д З.Энхзориг биш У.Мөнх-Эрдэнэ оролцвол медаль хүртэх магадлал өндөр байгаа аж. Учир нь, чансаагаараа дэлхийд нэгдүгээрт бичигдэнэ гэдэг нь маш том боломж гэдгийг түүний багш онцолж байсан юм.
Мөн олон жилийн турш жингээ тогтмол барина гэдэг бол тамирчин хүний тэсвэр тэвчээр, сахилга баттай шууд холбоотой аж. У.Мөнх-Эрдэнийн хувьд 64 кг-ын жинг олон жил барьж байгаа бол З.Энхзоригийн хувьд 50 кг-ын жингээс сүүлийн хэдэн жилийн турш өгссөөр өнөөдөр энэ жинд орж ирээд байгаа гэнэ.
ДАШТ- оролцохын тулд З.Энхзоригтой сорилго тэмцээнд оролцож болохгүй юу гэсэн асуултын хариуд У.Мөнх-Эрдэнэ хариулахдаа, “Би нэг л зүйлийг хэлье. Оюутны универсад наадамд ОХУ болон манай улс хоёр шигшээ багийнхаа тамирчдаа оруулсан. Бусад улсын тамирчид нь оюутан байсан. Гэтэл энэ тэмцээнээс З.Энхзориг медаль хүртэж чадаагүй шүү дээ. Би азийн наадам байтугай оюутны наадмаас медаль хүртэж чадаагүй тамирчинтай тулалдахгүй. Үнэн юм үнэнээрээ л байх ёстой. Дэлхийн аваргад оролцоно гээд бэлтгэлээ базаачихаад байхад зориудаар намайг ингэж бухимдуулж байна” гэсэн тайлбарыг өгч байлаа.