100 буудалт даамын эмэгтэйчүүдийн 38 дахь удаагийн дэлхийн аварга шалгаруулах тэмцээн манай улсад амжилттай болж дууслаа. Дэлхийд чансаатай тамирчин гэдгээ дахин баталж, алтан медалийг дэлхийн 12 удаагийн аварга, олон улсын их мастер Латви улсын тамирчин Зоя Голубева хүртлээ. Түүний оролцсон 25 дахь удаагийн дэлхийн аварга шалгаруулах тэмцээний талаар “Маш өрсөлдөөнтэй боллоо. Дэлхийд алдартай, сайн тамирчидтай Монголд оюун ухаанаа сорин өрсөлдөж ялагч болсондоо баяртай” байна гэлээ. Харин хоёрдугаар байрт Украйн улсын тамирчин, дэлхийн дөрвөн удаагийн аварга Дарьяа Такаченко шалгарч мөнгөн медаль, 3500 еврогоор шагнуулсан юм. Удаах байрт ОХУ-ын тамирчин, дэлхийн таван удаагийн аварга Тамара Тансукизина шалгарч, хүрэл медаль хүртэж, 2500 еврогийн эзэн боллоо. Эх орноо төлөөлөн оролцсон М.Одгэрэл, М.Нямжаргал, Э.Мандахнаран нар 13-15 дугаар байрт шалгарсан байна.  Нийтдээ  дэлхийн 10 орны 16 шилдэг тамирчин оюун ухаанаа сорьсон 100 буудалт даамын эмэгтэйчүүдийн 38 дахь удаагийн дэлхийн аварга шалгаруулах тэмцээний нийт шагналын сан 20 мянган евро юм.