Эр хүн хэлсэндээ, эмээлт морь харайсандаа. Өнгөрсөн долоо хоногт монголчууд энэ үгийг жинхэнэ утгаар нь мэдэрсэн гэхэд болно. Монгол Улсын Гавьяат тамирчин Уранчимэгийн Мөнх-Эрдэнэ Казахстаны Ал­ма­ты хотын тэнгэрт эх орныхоо алтан соёмбот дал­бааг мандуулсан баярыг бид хамтдаа хуваалцлаа. 2013 оны дэлхийн аваргын рин­гэнд манайхаас долоон тамирчин зодоглосноос Гавьяат тамирчин У.Мөнх-Эрдэ­нэ хүрэл медаль хүртсэн энэ баярт үйл явдал хүн бүрийн амнаас ам дамжих ярианы гол сэдэв болов.

Гавьяат тамирчин У.Мөнх­-Эрдэнэ сонир­хогч­дын боксын насанд хүрэгч­дийн ДАШТ-ий 64 кг-ын жинд зодоглож, эхний той­рогт хийлж, дараагийн той­рогт Туркменистаны Азиз Бебитовыг 3:0-ийн харь­цаатай оноогоор ялсан.
Үү­ний дараа Болгарын та­мир­чин Айрин Сметовыг 3:0 (30-27; 30-27; 30-27) харь­цаатай буулган авснаар шөв­гийн наймд шалгарсан би­лээ. Хүрэл медалийн тө­лөө Узбекстаны тамирчин Санжарбек Рахмановтой тоглож, 3:0-ийн харьцаатай /29:28, 30:27, 29,28/ ялж, мөнгөн медалийн төлөө шалгараад байсан юм. Харин өнгөрсөн баасан гарагт мөнгөн медалийн төлөө Ку­бын тамирчин Ясниер Ло­пестой тоглож мөн л 3:0-ийн харь­цаатай /30:27, 30:27, 30:27/ ялагдал хүлээсэн. Ме­далийн өнгөө хувиргах бо­ломж байсан даа гэсэн ха­руусал цээжний гүнд байх ч ДАШТ-нд эх орныхоо нэрийг дуу­дуулж, медаль хүртсэн нь ха­рууслыг минь нам цохих шиг.

Монголын боксчид 1974 онд Кубын Гаванад бол­сон анхны ДАШТ-нээс эх­лэн дэлхийн шилдгүүдтэй өр­сөл­дөж, 1982 онд Гавьяат та­мирчин Р.Отгонбаяр агсан анх­ны мөнгөн медаль эх орон­доо авчирч байлаа. Үү­нээс хойш 1993 онд Э.Цогт­жаргал (хүрэл), 1997 онд Т.Үйтүмэн (мөнгө), 2007 онд Э.БадарУуган (мөнгө), 2009 онд П.Сэрдамба (алт), Н.Төгсцогт (мөнгө), У.Мөнх-Эрдэнэ (хүрэл), 2011 онд П.Сэрдамба (хүрэл) нар дэлхийн аваргын рингнээс медальтай ирж байсныг уншигчид маань санаж байгаа байх. Тэг­вэл дэлхийн аваргын отгон ме­даль Гавьяат тамирчин У.Мөнх-Эрдэнийн энгэрт гялалз­санаар тэрээр дэлхийн авар­гын медалиа ихэрлүүлж чад­лаа. Энэ амжилтыг таар­сан хүн болгонд яриад л баймаар. Монголчууд хэзээ­ний л шартай хүмүүс. Тийм ч учраас ингэж санагдаж байж мэдэх.
Тамирчид ДАШТ-ийг зо­рихын өмнө багахан мар­гаан­­тай зүйл гарсан. Өнөө жи­лийн УАШТ-д Гавьяат та­мирчин У.Мөнх-Эрдэнэ маань халуунтай байсны улмаас эхний даваандаа “Алдар”-ын Б.Чинзоригт дийлдэж, улмаар ОУХМ З.Энхзориг аваргалсан юм. Монголын боксын холбооноос улсын аваргад түрүүлсэн тамирчинг ДАШТ-д явуулах дүрэмтэй. Энэ дүрмийн дагуу З.Энх­зориг сонгогдсон ч Гавьяат тамирчин У.Мөнх-Эрдэнэ маань жиндээ рейтинг дээ­гүүр учраас энэ сонголттой санал нийлж чадаагүй. Ингээд хоёр тамирчны дунд сорилт спарринг хийж, холбооноос ялсныг нь ДАШТ-д явуулах шийдвэр гаргасан юм. Сорилго тулаанд У.Мөнх-Эрдэнэ илүүрхэж, ДАШТ-д явах эрх өвөртөлсөн нь оножээ. У.Мөнх-Эрдэнэ халз тоглолтын дараа “Миний хувьд спарринг гол зорилго биш ээ. Харин гол зорилго бол ДАШТ. Үлдсэн хугацаанд бие бялдар, сэтгэлзүйн бэлтгэлээ сайн хийж, ДАШТ-д амжилттай оролцохыг хүсч байна” хэмээн ярьж байсан. Үнэхээр тэр хэлсэн үгэндээ хүрч, дэлхийн энтэй тамирчин гэдгээ дахин баталлаа.
Монгол Улсын Гавьяат та­мирчин Уранчимэгийн Мөнх-Эрдэнээрээ бахархахын дээ­дээр бахархаж байна. Тэ­рээр Монголын боксын хөгж­лийн хүнд хэцүү үед ган­цаараа л зүтгэж байсан. 2004 оны Афины олимпын наа­дамд эх орноо төлөөлөн орол­цож байсан бол 2008 оны Бээжингийн олимпын медалиас мултрахдаа  уйлсан ч шантралгүй, бэлтгэлээ хийсээр л байсан гэдэг. Тамирчин хүний хөдөлмөрч, уйгагүй, шаргуу зангийнхаа ачаар тэрээр дэлхийн аваргаас хүрэл медаль авч, Азийн аварга гэх цол хүртэж чадсан. 2012 оны Лондонгийн олимпоос хүрэл медаль эн­гэртээ гялалзуулснаар тэ­рээр Дэлхийн боксын холбооны хуанли дахь бүх тэмцээнээс медаль хүртсэн Монгол та­мирчин гэх эрхэм алдар хүр­тэх болсон юм. Гэхдээ тэр амжилтадаа ханаж, том ярьсан удаагүй. Спорт бэлт­гэлийн төвийн бок­сын заалаар гэрээ хий­сээр л байлаа. Ширэн бээ­лийтэй 17 жил нөхөрлөж, хө­дөл­мөр­лөснийхөө тө­лөө тэрээр олон ч орны тамирчныг нутгийнх нь дэвжээн дээр шүүгчдийнх нь хамт, үзэгчдийнх нь өмнө ялж явсан. Энэ бол монголчуудын ялалт. Тийм ээ, эр хүн хэлсэндээ гэдэгчлэн тэр энэ удаа ч зорьсондоо хүрч чадлаа...