Оросын өмнөд нутгийн дэлгүүрт террорист халдлага болсон нь ирэх онд Сочи хотноо болох гэж буй өвлийн олимпийн аюулгүй байдалд санаа зовоосоор байна.

Умард Кавказад орших, Оросын Бүгд Найрамдах Дагестан Улсын нийслэл Махачкала хотын нэг дэлгүүрт өчигдөр дэлбэрэлт болжээ.

Дэлбэрэлтийн улмаас нэг хүн амь үрэгдэж, хоёр хүн шархадсан байна.

Өнгөрсөн сарын 30-нд Махачкалагийн ойролцоо дэлгүүрүүдэд бөмбөг дэлбэрсний улмаас хоёр хүн амь үрэгдсэн билээ.

Энэ хоёр террорист халдлагын хариуцлагыг хэн ч хүлээгээгүй байна. Гэхдээ Оросын өмнөд нутгийн тайван байдалд лалын босогчид заналхийлсээр байгаа юм.

Мөн өнгөрсөн сарын 21-нд амиа золиослогч эмэгтэй Оросын Волгоград мужид автобусанд бөмбөг дэлбэлсний улмаас зургаан хүн амь үрэгдсэн.

Ирэх орны хоёрдугаар сард эхлэх Сочигийн өвлийн олимпийн наадамд саад учруулахаар лалын босогчид сүрдүүлж байна.

Оросын эрх баригчид аюулгүй байдлыг чангатгах арга хэмжээ аваад байгаа ч сүүлд болсон террорист халдлага түгшүүрийг улам нэмэгдүүллээ.