МУИС бүтцийн шинэчлэл хийхээр зэхээд буй. Багш нарынхаа чадварыг нэмэгдүүлж, өрсөлдөөн бий болгохын тулд одоогийн 14 салбар сургуулийнхаа тоог цөөлж, үндсэн дөрвөн салбартай болох эл шинэчлэлийг багш, оюутнууд эсэргүүцэж, МУИС-ийн шинэ удирдлага Б.Галтбаярыг өөрийн эрх мэдлийнхээ хүрээг тэлж, зузаатгах гэсэн оролдлого хийж байна хэмээн үзэж буй. Тэднийг төлөөлж МУИС-ийн Үйлдвэрчний эвлэлийн дарга Ч.Чойсамба “МУИС-ийн бүрэлдэхүүн сургуулиудын багш ажилтан захирлаа сонгодог байсан бол захирал бүрэлдэхүүн нь сургуулиудын захирлыг шууд томилдог зарчим руу орох гэж байна. Энэ нь, эрдмийн зөвлөлийн саналыг удирдах зөвлөлөөр хэлэлцэнэ гэсэн зарчмыг зөрчиж байна” хэмээсэн. Харин энэ талаар дээрх шинэчлэлийн бүтцийг боловсруулсан МУИС-ийн Гадаад харилцаа хариуцсан дэд захирал Л.Мөнх-Эрдэнээс тодруулахад “Бид шинэчлэлийн журмын дагуу бүрэлдэхүүн сургуулиудын багш, оюутантай  уулзалт хийгээд дуусч байна. Тэд шинэчлэлд нааштай хандаж байгаа ч багш нарын оролцоог нэмэгдүүлээч гэсэн санал гаргасан. Гэхдээ сургуулийнхаа эрх ашгийн төлөө шинэчлэлд дургүйцэх цөөн хүн гарч байна” гэлээ. Ямартай ч, Монгол Улсын ууган сургуулийнхан шинэчлэлийг тун хүндээр хүлээн авлаа.