Катарт 2022 оны зун зохион байгуулахаар төлөвлөөд буй хөлбөмбөгийн ДАШТ-ийг өвөл хийхээр болгох хэрэгтэй эсэх талаар тоглогчид болон албаны хүмүүсийн санал бодлыг сонсохоор дэлхийн хөлбөмбөгийн удирдах байгууллага ФИФА төлөвлөжээ.

Тоглогчид болон албаны хүмүүсийн санал бодлыг сонсох хугацааг Бразилын зүүн хойд нутгийн Коста-де-Сауипе хотод болсон уулзалтын үеэр ФИФА-гийн удирдлагууд товлосон байна.

Ирэх оны 1-8 дугаар сард тоглогчид, клубууд, хөлбөмбөгийн холбоод болон ивээн тэтгэгчидтэй ФИФА-гийн албаны хүмүүс ярилцах аж.

Персийн буланд орших Катар улсад зун хөлбөмбөгийн тэмцээн зохион байгуулахад хэтэрхий халуун гэж зарим хүн түгшиж буй юм.

Хэрвээ 2022 оны хөлбөмбөгийн ДАШТ-ийг өвөл зохион байгуулахаар өөрчилбөл Европын хөлбөмбөгийн холбоод улирлын тоглолтуудынхаа хуваарийг дахин гаргах хэрэгтэй болно. Энэ өөрчлөлт 2022 оны өвлийн олимпын наадмын хуваарьт ч мөн нөлөөлөх юм.