Энэ онд Бразильд болох хөлбөмбөгийн ДАШТ-ий үеэр онгоцны тасалбар, зочид буудлын үнийг хаданд гаргачихгүйн тулд тус улсын эрх баригчид агаарын тээврийн компаниуд болон зочид буудлын удирдлагуудтай уулзаж ярилцаж байна. Тэмцээнийг үзэхээр  Бразильд гадаадын 600 мянган жуулчин ирэх таамаг бий. Тэмцээн зөвхөн нэг газар болохгүй, 12 хотод болох учраас Бразилийн орон нутгийн нислэгчийн ачаалал ч үлэмж хэмжээгээр нэмэгдэх нь тодорхой. Гэвч энэ боломжийг ашиглан дотоодын агаарын тээврийн компаниуд үнээ өсгөхгүй гэх газаргүй учраас эрх баригчид тэдэнтэй урьдчилан тохиролцож байгаа бөгөөд хэрэв тэд шударга бус үнэ тогтоовол тэмцээний үеэр олон улсын агаарын тээврийн компаниудад орон нутагт нислэг үйлдэх зөвшөөрөл өгөхөөр ярилцаж байгаа аж. Мэдээж, Бразилийн эрх баригчид дотоодын компаниудаа энэ алтан боломжийг ашиглаж, аль болох өндөр ашиг орлого олоосой гэж хүсч байгаа ч хамгийн гол нь зохиомлоор үнэ өсгөхгүй байхыг сануулж байгаа гэнэ. Зочид буудлуудын хувьд ч мөн ийм сануулга өгчээ.
Дашрамд сануулахад хөлбөмбөгийн ДАШТ зургадугаар сарын 12-ноос долдугаар сарын 13-ны хооронд үргэлжилнэ.