Албан тушаалаа урвуулан ашигласан хэргээр долоон жилийн ял аван хоригдож буй Украины Ерөнхий сайд асан Юлия Тимошенкод хүнлэг хандаж, эрх нь зөрчигдөж буй эсэхийг шалгахыг Оросын Гадаад хэргийн яам шаарджээ. Хоригдсон цагаасаа хойш эрүүл мэнд нь дордсон хэмээн мэдээлж буй Ю.Тимошенко дөрөв хоногийн өмнөөс өлсгөлөн зарлаж эхэлсэн юм. Тэрээр өөрийг нь зодсон шоронгийн балмад халдлагыг эсэргүүцэж өлсгөлөн зарлаж байгаа аж. Өнгөрсөн баасан гаригт шоронгийн гурван харгалзагч түүнийг орон нутгийн эмнэлэг рүү хүчээр авч явах гэж оролдож, эсэргүүцсэн учир гар, хөлийг нь хүлж байгаад зодсон аж. Ю.Тимошенко Украины дотоодын эмч мэргэжилтнүүдийн гаргах онош дүгнэлтэд итгэхгүй байгаа учир орон нутгийн эмнэлэгт үзүүлэхгүй хэмээн эсэргүүцжээ. Гэтэл түүнийг хүчээр авч явахдаа элэг цээж рүү нь хүчтэй цохисноос болж тэрээр бүр ухаан алдаж унасан бөгөөд сэрэхэд нь аль хэдийнэ эмнэлэгт ирсэн байсан гэнэ. Хэвлэлүүдээр гарч буй энэ мэдээллийг үндэслэн Оросын Гадаад хэргийн яам Украины эрх баригчдад шаардлага хүргүүлэхдээ экс Ерөнхий сайдын хүний эрхийг зөрчихгүй байхыг анхааруулсан байна.