Дэлхий нийтийн анхаарал Сочигийн зүг хандаж байгаа энэ үед жүдо бөхийн чансаа өндөр “Их дуулга”-ын тэмцээн Францын нийслэл Парис хотноо болж байгаа билээ. Өчигдөр эхэлсэн тус тэмцээнд дэлхийн 75 орны 472 тамирчин уламжлал ёсоор эрэгтэй, эмэгтэй тус бүр долоон жингийн ангилалд өрсөлдөж буй юм.

Тэмцээний эхний өдөр хөнгөн жингийн, тодруулбал, эрэгтэйчүүдийн 60, 66, 73 кг, эмэгтэйчүүдийн 48, 52, 57, 63 кг-ын жингийн барилдаан болж, Монголын 12 жүдоч Парисын татамид зодоглосноос эрэгтэйчүүдийн хамгийн хөнгөн жин болох 60 кг-д ОУХМ Г.Болдбаатар аваргын алтан медаль хүртэж, Гавьяат тамирчин, дэлхийн аварга М.Уранцэцэг эмэгтэйчүүдийн 48 кг-д мөнгөн медаль хүртлээ. Энэ амжилтаараа Монголын жүдочид маань багийн дүнгээр гуравдугаар байрт бичигдэж байна.