Гуравдугаар сарын 7-16-ны өдрүүдэд өвлийн паралимпийн наадам Сочи хотноо болно. Энэ удаагийн паралимпод Монгол Улсыг төлөөлж пара гүйлтийн цанын тамирчин Б.Ганболд өрсөлдөх юм. Түүний дасгалжуулагчаар Ж.Дашдондог ажиллаж байгаа билээ.

Паралимпийн өвлийн XI наадамд оролцох Монголын баг бүрэлдэхүүнийг үндэсний үйлдвэрлэгч “Говь” брэнд ивээн тэтгэж, хамтран ажиллахаар болсон байна. Хамтрах ажиллах гэрээнд гарын үсэг зурах ёслол өчигдөр болсон бөгөөд “Говь” компани тамирчдын наадмын нээлт, хаалтын ёслолын ажиллагаа болон бусад албаны үйл ажиллагаанд өмсөх хувцсаар ивээн тэтгэх ажээ.
Паралимпийн багийн бүрэлдэхүүнд нийт 10 хүн багтаж байна. Монголын тамирчин, дасгалжуулагч, албаны хүмүүс 100 хувийн ноолууран цамц, өмд, малгай ороолт, бээлий, хантааз зэргээр хувцаслана. Баг тамирчдад тусгайлан зориулан урлаж буй тус хувцсыг төрийн далбааны улаан, цэнхэр өнгийг хослуулан урлаж байгаа аж.