Энэ сарын эхээр болсон боксын УАШТ-ий 60 кг-ын жинд түрүүлсэн ирээдүйтэй тамирчдын нэг Д.Отгондалайтай ярилцлаа.

- Хэзээнээс энэ спортоор хичээллэж эхэлсэн бэ?
-Дорнод аймгийн боксын клубт 2003 онд орж байлаа.
- Боксын ихэнх тамирчин багадаа хөдөлгөөнтэй хүүхэд байсан учраас энэ спортыг сонгосон гэж ярьдаг?
-Тийм ээ, би ч аравдугаар анги хүртлээ их л хөдөлгөөнтэй хүүхэд байсан. Тэгээд боксоор хичээллээд даруухан болсон доо. /инээв/
- Сая улсын аварга болох хүртлээ ямар амжилт гаргаж байв?
- Өсвөрийн аварга, залуучуудын аварга шалгаруулах тэмцээнд тус бүр хоёр удаа түрүүлж байсан. 2009 оноос насанд хүрэгчдийн УАШТ-нд оролцож эхлээд, таван алт, гурван мөнгө, нэг хүрэл медальтай болоод байгаа. Олон улсын тэмцээний хувьд Ази тивийн аваргаас мөнгө, Кубад болсон тэмцээнээс хүрэл медаль хүртсэн.
- Энэ жилээс УАШТ толгойны хамгаалалтгүй болсон. Үүн дээр ямар бодолтой байна вэ?
- Эхэндээ эвгүй байсан. Харин одоо бол дасчихсан. Хамгаалалтгүй болсноор илүү чөлөөтэй хөдлөх боломжтой учраас зөв л гэж бодож байна.
- Бэртэл гэмтэл авах  эрсдэлтэй биш үү?
- Тийм ч сүйдтэй бэртэл аваад байдаггүй. Хөмсөг сэтрэх гээд мэр сэр юм бий.
- Зун Азийн аварга болно. Бэлтгэл сургуулилтдаа гарсан уу?
- УАШТ дуусгаад нэг хоног амраад бэлтгэлдээ гарсан. Одоо бэлтгэлээ хийх гээд сууж байна.  
- Ер нь, боксчин хүний хувьд амжилт гаргахад хамгийн чухал зүйл юу вэ?
- Бэлтгэл, сургуулилтаас гадна дасгалжуулагч, багшийн үүрэг даалгавар их нөлөөлдөг гэж боддог. Багшийнхаа өгсөн даалгаварыг л сайн биелүүлэх хэрэгтэй. Бэлтгэл, сургуулилтаа тасалдуулж болохгүй.
- Дасгалжуулагч болно гэж боддог уу?
- Үгүй ээ. Би чинь барилгын инженер мэргэжлээр суралцаж байгаа шүү дээ.
- Их содон сонсогдож байна шүү. Боксчин инженер?
- Тийм ээ. ШУТИС-ийн барилгын инженерийн ангид сурч байгаа.