Болгарын Софи хотноо болж байгаа сонирхогчийн боксын дэлхийн залуучуудын аварга шалгаруулах тэмцээний эрэгтэйчүүдийн 49 кг-д Б.Төмөрхуяг, 52 кг-д Г.Баттамир, 60 кг-д Д.Төрмандах нар эхний учраагаа ялав.

2014 оны залуучуудын ДАШТ энэ сарын 14-нд нээлтээ хийсэн бөгөөд манай улсаас эрэгтэй долоо, эмэгтэй гурван жинд хийт 10 боксчин оролцож байна. Эрэгтэйчүүдийн 49 кг-д тоглож байгаа  Б.Төмөрхуяг эхний тоглолтдоо Өмнөд Африкийн боксчин Эдвин Тшабалалатай хийж, гурван үед илүүрхэн ялсан бол 52 кг-д Г.Баттамир БНСУ-ын Хан Ёнхунгийг 3:0-ийн харьцаагаар хожиж эхний ялалтаа авлаа. Өчигдөр 60 кг-д тоглосон Д.Төрмандах Германы тамирчинг ялсан бол 56 кг-д Э.Цэндбаатар Пуэрто-Рикогийн боксчинд ялагджээ.

Манай тамирчдын амжилтыг олон улсын боксын холбооны aiba.org  сайтад “Тоглолтын эхний өдөр, төгс монголчууд” гэж онцлон бичжээ. Б.Төмөрхуяг, Г.Баттамир нар өрсөлдөгчдөө ямар ч боломж олголгүй илүүрхэн хожсон нь ингэж нэрлэх шалтгаан болжээ.

Энэ удаагийн ДАШТ-д өрсөлдөж байгаа Монголын багийн бүрэлдэхүүнд Б.Төмөрхуяг /49 кг/, Г.Баттамир /52 кг/, Э.Цэндбаатар /56 кг/, Д.Төрмандах /60 кг/, М.Далай /64 кг/, Р. Нямдорж /69 кг/, Цэнгүүн /75 кг/, эмэгтэй боксчдоос О.Нандинсувд /эм 51 кг/, Б.Үүрийнтуяа /эм 60 кг/, Д.Эрдэнэтуяа /эм 75 кг/ нар багтсан юм. Сонирхогчдын боксын залуучуудын ДАШТ энэ сарын 24-нд өндөрлөнө.