Цахилгааны барааны үйлдвэрлэлээр Япондоо тэргүүлч “Хитачи” компани сүүлийн хоёр жил дараалан рекорд тогтоохоор өндөр орлоготой ажиллажээ. Тус компанийн орлого өнгөрсөн онд 45 хувиар өсч 347 тэрбум иен буюу 4,35 тэрбум ам.долларт хүрсэн байна. Будаа агшаагчаас эхлээд цөмийн үйлдвэр хүртэл өргөн хүрээтэй үйлдвэрлэл явуулдаг тус компанийг 2010 оноос Хироаки Наканаши удирдаж эхэлснээр орлого ашиг нь илт өсөх болсон юм. “Хитачи”-гийн ерөнхийлөгч Хироаки Наканаши компанийнхаа орлого ашгийг нэмэгдүүлэхэд хамаг анхаарлаа тавьсны хүчинд Японы бусад цахилгаан бараа үйлдвэрлэгчид түүхэндээ байгаагүй алдагдал хүлээж байхад тэднийх ганцаараа орлого нь өссөн амжилттай байна. Японы цахилгаан бараа үйлдвэрлэгчид сүүлийн дөрвөн жилийн хугацаанд нэг их наяд иен буюу 12.5 тэрбум ам.долларын алдагдал хүлээгээд байгаа юм.