Дэлхийн хөлбөмбөгийн аварга шалгуурлах тэмцээн эхлэх өдөр ойртох тусам Бразильтай холбоотой янз бүрийн дуулиант мэдээлэл гарах болсон. Наад зах нь Бразилийн цагдаа нар дэлхийн аварга шалгаруулах тэмцээний үеэр ирэх гадаадын жуулчдад зориулан  аюулгүй байдлаа хангах гарын авлага гаргажээ.
Энэ гарын авлагад дээрэмчдийн халдлагад өртсөн үед”Эсэргүүцэхгүй, хашгирахгүй, маргалдахгүй байх”-ыг жуулчдад зөвлөсөн аж. Жуулчид шуугиан тарьж, ямар нэгэн байдлаар эсэргүүцвэл амиа алдах магадлал эрс нэмэгдэнэ гэдгээр цагдаа  нар өвөрмөц гарын авлагаа зөвтгөж.
Мөн жуулчдыг хулгайч дээрэмчдийн анхаарал татахуйц үнэт зүйлсээ ил гаргахгүй, орой үдшийн цагаар гадагшаа гарахгүй байхыг анхааруулав.
Бразиль нь гэмт хэргийн түвшингээрээ дэлхийд хамгийн дээгүүрт ордог, хүн амд ногдох аллагын тоогоор ч тэргүүлдэг орон юм. Ялангуяа Дэлхийн аварга шалгаруулах тэмцээн явагдах том хотуудын ядуусын хороололд гэмт хэрэг гарах нь хамгийн их байдаг аж.