Монголын Хөлбөмбөгийн холбооноос жил бүрийн 6 дугаар сарын 1-ний “Хүүхдийн баяр”-ын өдрийг “ХҮҮХЭД-ХӨЛБӨМБӨГ-ИРЭЭДҮЙ” хөтөлбөрийн хүрээнд “Хүүхдийн хөлбөмбөгийн баяр” болгон тэмдэглэн өнгөрүүлдэг уламжлалтай. Энэ уламжлалын дагуу энэ жилийн хүүхдийн баяраар бяцхан хүүхэд багачуудыг МХБХ-ны “Цэнгэлдэх хүрээлэн”-д хүлээн авч, мэргэжлийн багш дасгалжуулагч нараар хөлбөмбөгийн анхан шатны арга техник болон олон төрлийн элемент, дасгал хөдөлгөөнүүдийг заалгаж, тэдэнтэй цуг тоглож, “Хүүхдийн хөлбөмбөгийн баяр”-ыг баяр баяслаар дүүрэн тэмдэглэж, мартагдашгүй сайхан дурсамжтай өнгөрөөлөө. Багачуудын хүсэл мөрөөдлийг танадан хуваалцахад олонх хүүхэд дэлхийн хөлбөмбөгийн од Роналдо, Месси нар шиг шилдэг хөлбөмбөгчид болохыг хүсэж буйгаа илэрхийлж байлаа. Мөн Манчестер Юнайтед багт орж тоглох том мөрөөдөлтэй хүү ч тэдний дунд байлаа. Ийнхүү хүүхэд багачуудад зориулсан энэхүү арга хэмжээ үр өгөөжөөр дүүрэн, оролцсон хүүхдүүд төдийгүй тэдний эцэг эх, ах эгч нарын сэтгэлийг хөдөлгөсөн арга хэмжээ болов.