Монголын олимпын боксын холбоо удахгүй болох зуны 30 дугаар буюу Лондонгийн олимпод дөрвөн жинд тамирчнаа илгээхээр болсон билээ. Олимп дөхсөн энэ цаг үед шигшээ багийн тамирчид ОХУ-ын зүүн хязгаарын Хабаровск хотноо хамтарсан бэлтгэл хийж байна. Олимпын эрхээ хүртээд буй Монгол Улсын  хөдөлмөрийн баатар, гавьяат тамирчин П.Сэрдамба, Монгол Улсын гавьяат тамирчин Н.Төгсцогт, У.Мөнх-Эрдэнэ, олон улсын хэмжээний мастер Б.Түвшинбат нар дасгалжуулагч Д.Ганзоригийн хамтаар яваа юм. Тэд энэ сарын 17 нд олон улсын тэмцээнд оролцоод эх орондоо ирэх аж.