Малайзын Дээд шүүх таван хүнд хар тамхи дамлан наймаалсан хэргээр цаазаар авах ял оноожээ. Ялын дээд хэмжээ сонссон эдгээр таван хүний гурав нь Мексик гаралтай ах дүүс байсан бол нөгөө хоёр нь Малайз, Сингапурын иргэд байжээ. Тэд Малайзын өмнөд хэсгийн Жохор мужид 15 сая ам.доллараар үнэлэгдэх 29 килограмм мансууруулах бодис авч яваад баригдсан аж. Малайзад хар тамхины наймаа нь цаазын ялаар шийтгэгддэг юм. Тус улсад цаазаар авахуулсан гэмт хэрэгтнүүдийн тал хувь нь ийм төрлийн хэрэг үйлдсэн хүмүүс байдаг. Малайзын шүүх өнгөрсөн 50 жилийн хугацаанд 440 хүнд хар тамхины хэргээр цаазын ял оноосон байна.