Улаанбаатар хотноо зохион байгуулагдсан Азийн оюутны аварга шалгаруулах 2 дугаар тэмцээнд амжилттай оролцон мөнгөн медаль хүртсэн Монголын оюутны волейболын шигшээ багийн дасгалжуулагч, оюутан, зохион байгуулагч нарт БСШУЯам, БТСГазар, МОХ-ны шагналуудыг 2012 оны 5 дугаар сар 17-ны өдөр БСШУЯаман дээр гардуулан өглөө.

Монголын баг тамирчдаа амжилттай бэлтгэн оролцуулсан багийн дасгалжуулагч ҮБТДС-ийн багш Б.Хэрлэнг Боловсролын тэргүүний ажилтан цол тэмдэгээр, дасгалжуулагч МУБИС-ийн багш  Р.Тамирыг БСШУЯ-ны жуух бичгээр тус тус шагнав.

 Тус тэмцээний мөнгөн медальт, шилдэг либеро тоглогчоор шалгарсан ШУТИС-ийн оюутан Ч.Халиун, тэмцээний шилдэг довтлогч, ҮБТДС-ийн тамирчин  Б.Цэндхүү, МУБИС-ийн тамирчин А. Пүрэвсүрэн нарыг Засгийн газрын хэрэгжүүлэгч агентлаг БТСГ-ийн шагнал “Спортын алдар” алтан медалиар шагнасан байна. Мөн тамирчин Л.Отгонцэцэг, ШУТИС-ийн оюутан П.Буянжаргал нарыг МОХ-ны “Манлайлагч оюутан” цол, тэмдгээр тус тус шагнасныг БСШУЯ-ны төрийн нарийн бичгийн дарга Д.Далайжаргал, МОСХ-ны ерөнхийлөгч Д.Баясгалан, МОХ-ны ерөнхий нарийн бичгийн дарга Н.Бямбагэрэл нар гардуулан өглөө.

Монголын оюутны холбоонд 1988-1993 он, МОСХ-нд 1993 оноос одоог хүртэл  сонгогдон ажиллаж байгаа болон оюутан залуучуудыг дэлхийн оюутны аварга шалгаруулах тэмцээн, Универсиад их наадмуудад 1993 оноос эхлэн амжилттай бэлтгэн оролцуулсан, өрийн орондоо 5 удаагийн оюутны дэлхийн болон азийн аваргын тэмцээнийг зохион байгуулсан, Олон улсын оюутны спортын холбооны ГХ-ны гишүүн, ерөнхий санхүүчээр 2003 оноос эхлэн үр дүнтэй ажиллаж байгаа, оюутны спортыг хөгжүүлэх, тэмцээн, наадам зохиох, оюутны тэтгэлэг олгох, эрдэм шинжилгээний хурлыг жил бүр зохион байгуулж оюутан, боловсролын байгууллагыг дэмжих чиглэлээр олон талт арга хэмжээг авч энэ салбарт оруулж байгаа хувь нэмрийг нь үнэлж МОСХ-ны ерөнхийлөгч, ОУОСХ-ны ерөнхий санхүүч Д. Баясгаланг БСШУ-ны сайд Ё.Отгонбаярын шийдвэрээр Боловсролын тэргүүний ажилтан цол тэмдэгээр шагнасан байна.

Шагнал гардуулах ёслолын ажиллагаанд БСШУЯ, МОХ, МОСХ-ны албаны хүмүүс, их, дээд сургуулиудын ректор, захиралууд, багш нар, оюутан тамирчид, төвийн хэвлэл мэдээлэлийн төлөөлөгчид оролцлоо.