Мэргэжлийн сүмогийн дээд зиндаанд Монгол Улсын Гавьяат тамирчин Кёкүтэнхо Цэвэгням анх удаа түрүүллээ. Тэмцээний сүүлийн өдөр Гоиёдог давж, улмаар Точёзантай нэмэлт барилдаан хийж давснаар Мэргэжлийн сүмогийн дээд зиндаанд анх удаа түрүүлж байгаа нь энэ юм. Тэрээр, Эзэн хааны цом, ялалтын тугийг сүмогийн холбооны тэргүүнээс гардан авлаа. Мөн Япон Улсын Ерөнхий сайдын цомыг гардан авсны дараа “NHK телевизэд ярилцлага өгсөн юм.



-Анх удаа түрүүлсэнд баяр хүргэе?
-Японд ирээд маш олон хүний дэмжлэгээр энэ амжилтад хүрсэн.  Баярлалаа.
-37 нас найман сартайдаа түрүүлсэн юм байна?
-Түрүүлсэндээ үнэхээр итгэхгүй байна. Би өдөр болгон хичээж барилдсан.
-Хоёр хоногийн өмнө буюу 13 дахь өдрөөс түрүүлэх нь тодорхой болсон. Энэ танд дарамт болж байв уу?
-Анх удаагаа ийм зүйл мэдэрсэн болохоор хоёр хоног унтаж чадаагүй шүү. Өчигдөр л гэхэд архи ууж унтсан.
-Точязаныг барилдалгүй даваа авахад та юу бодож байв?
-Энэ үед өөрийхөө барилдааныг л бодож суулаа.
-Точязантай нэмэлт барилдаан хийхэд яаж барилдая гэж бодсон бэ?
-Олон хүн надад найдаж байсан болохоор энэ найдварыг биелүүлэхээс аргагүй байсан. Тиймээс гал гарсан сайхан барилдаан үзүүлье гэж хичээсэн.
-Та давсныхаа дараа нулимс унагаж байсан?
-Тийм ээ. Би сүүлийн үед уйланхай болоод байгаа. Энэ баярын нулимс байсан. 20 жил барилдлаа. Ийм амжилтад хүрсэндээ баяртай байна.
-Таныг гараад машинд суугаад явахад Ёкозуна хажууд чинь сууж явах юм байна?
-Үнэхээр их баяртай байна. Би энэ амжилтаа бататгаж сайн барилдах болно оо. Та бүхэн намайг дэмжээрэй.