УИХ-ын Төсвийн байнгын хорооны өнөөдрийн хуралдаанаар Орон нутгийн хөгжлийн сан болон Сум хөгжүүлэх сангийн хөрөнгийн зарцуулалтын талаарх Үндэсний аудитын газрын тайланг сонсов.

Өнгөрсөн оноос эхлэн манай улс Орон нутгийн нэгдсэн сангийн орлогыг хуулийн дагуу бүрдүүлж, орон нутаг хуваарилсан хөрөнгөөр нь иргэдийнхээ саналд үндэслэж, шаардлагатай төсөв хөтөлбөрийг санхүүжүүлж байгаа юм. Харин Сум хөгжүүлэх сан нь сумдад жижиг дунд үйлдвэр байгуулах буюу өргөтгөх, сэргээх, шинээр ажлын байр бий болгох, жижиг дунд үйлдвэрлэл эрхлэгчдэд санхүүгийн дэмжлэг үзүүлэх зэрэг үйл ажиллагаа явуулж буй. Байнгын хорооны өнөөдрийн хуралдаанд Үндэсний аудитын газрын удирдах ажилтнууд оролцож, тус сангуудад хийсэн шалгалтын дүнг танилцууллаа. Шалгалтаар тэдгээр сангаас олгох шилжүүлэг тооцох аргачлалыг жигд баримтлаагүй, иргэдийн оролцоо, ил тод байдлыг бүрэн хангаагүй, зээл олгох журам зөрчсөн, сонгон шалгаруулалтыг хуулийн дагуу явуулаагүй зэрэг зөрчил илэрчээ. Улсын Ерөнхий аудитор А.Зангад шалгалтын дүнг багцалж хэлэхдээ, сангийн хөрөнгийн зарцуулах бодлого, үйл ажиллагаанд хяналт тавих үр дүн хангалтгүй гэж үзсэн тухай танилцуулгадаа дурьдаж байсан юм. Танилцуулгатай холбогдуулж гишүүдийн сонирхсон асуудлаараа асуулт асууж, санал шүүмжлэл өрнүүлсний дараагаар дараагийн хуралдаанаар цаашид авах арга хэмжээний талаарх байнгын хорооны тогтоол гаргаж Засгийн газарт хүргүүлэхээр боллоо.