2012 оны элсэлтийн ерөнхий шалгалтад бэлтгэгчдийн гарын авлага болгон Боловсролын үнэлгээний төвөөс 2006-2011 оны ЭЕШ-ын хичээлийн даалгавруудын эмхэтгэл номыг хичээл тус бүрээр нь хэвлэсэн байгаа. Жилд ердөө 5000 хувь л хэвлэн борлуулдаг уг гарын авлагыг тойрсон элдвийн асуудал энэ жил ч тасарсангүй. Өнгөрсөн жилийнх нэлээд алдаатай гарч багш нар төдийгүй хүүхдүүдийг бухимдуулж байсан. Тиймдээ ч энэ жил ямар нэгэн алдаа гаргуулахгүйн тулд тестийнхээ сорил номыг дөрөв дахин шалгасан болохоор ямар ч асуудал гарахгүй гэж байлаа. Гэвч даалгавруудын түлхүүрүүд нэлээд алдаатай байгаа учир тест дээр ажиллахад хүндрэлтэй байна гэдэг гомдлыг олон ч хүн хэлж байна. Тэр дундаа нийгэм, англи хэлний сорилууд нэлээд алдаатай байгаа аж. Харин энэ талаар Боловсролын үнэлгээний төвд ямар нэгэн санал гомдол ирээгүй ч хүндрэл учруулж байгаадаа хүлцэл өчиж байна билээ.