Италийн хойд хэсгийн Эмилиа мужид газар хөдөлж, есөн хүн нас барсан тухай орон нутгийн телевизүүд мэдээлж байна. 5,8 магнитудын хүчтэй газар хөдлөлтөд цөөнгүй барилга нурж сүйдэж, нурангид нь хэд хэдэн хүн дарагдсан мэдээ байна. Газар хөдлөлт Милан болон Болонья хотод мөн мэдрэгджээ. Италийн энэ бүс нутагт 10 хүрэхгүй хоногийн өмнө мөн газар хөдөлж, долоон хүн нурангид даруулан амиа алдсан билээ.  Гамшгийн улмаас түргэн тусламж, онцгой байдлын газрын утас ачааллаа дийлэхгүй байгаагийн зэрэгцээ галт тэрэгний үйлчилгээ ч түр тасалдсан байна.