НҮБ-ын тусгай элч Кофи Аннан Сирид хүрэлцэн ирж, тус улсын Ерөнхийлөгч Башар Аль Ассадтай уулзаж, олон хүний амь насанд хүрч буй хүчирхийлэл, зөрчил мөргөлдөөнөө зогсоохыг шаардлаа. Өмнө нь, Сирид ирэхдээ гал зогсоох хэлэлцээрийг сөргөлдөгч хоёр талаар хийлгэж чадсан боловч тэр нь одоо хүртэл хэрэгжихгүй байгааг Кофи Аннан Сирийн Ерөнхийлөгчид сануулаад маргааш, нөгөөдөр гэж хойшлуулалгүй яг одоо яаралтай арга хэмжээ авна уу хэмээн хүссэн байна.  Харин түүний энэ хүсэлтэд Башар Аль Ассад хариу өгөхдөө гал зогсоох хэлэлцээр хэрэгжих эсэх нь сөрөг хүчнийхнээс шалтгаалж байгаа гээд өнгөрсөн долоо хоногт амь үрэгдсэн 108 хүнийг Засгийн газрын цэргүүд хөнөөгөөгүй, террористуудын хийсэн халдлага хэмээн хариуцлагыг өөрөөсөө зайлуулжээ.
Өнгөрсөн долоо хоногт Сирийн Хоула хотод гарсан халдлагын улмаас 49 хүүхэд, 34 эмэгтэй амь насаа алдсан нь олон улсыг цочирдуулж, барууны ихэнх орон Сирийн дипломат төлөөлөгчдийг нутаг дэвсгэрээсээ хөөгөөд байна. Тухайлбал, АНУ, Франц, Их Британи, Герман, Итали, Испани, Канад, Австрали зэрэг орон Сирийн Элчин сайдыг нутаг руугаа буцахыг шаардсан юм.