Афганы хойд хэсгийн Талуган хот дахь охидын сургуулийн сурагчид бөөнөөрөө хордон эмнэлэгт хүргэгджээ. Сурагчдыг хичээлдээ орохын өмнөхөн анги танхимд нь хортой бодис цацсан байсан бололтой. Хичээл эхлээд удаагүй байхад сурагчдын толгой өвдөж, халууран, заримд нь бөөлжих шинж тэмдэг ажиглагдаж эхэлжээ. Нийтдээ 160 охин хордлогын улмаас эмнэлэгт хүргэгдээд байна.
Сурагч охид бөөнөөрөө хордсон явдал ганц үүгээр зогсохгүй. Ердөө долоо хоногийн өмнө Кабул хотын бас нэг сургуулийн 120 гаруй охин багш нарынхаа хамт хордож, одоо эмчилгээ хийлгэж байгаа билээ. Энэ бүхний цаана Талибан бүлэглэлийнхэн байгаа гэж афганчууд сэрдэж байгаа юм. Талибан бүлэглэлийнхэн охидыг сургуульд явуулахыг эсэргүүцдэгээ ийм аргаар илэрхийлж байна хэмээн нутгийн иргэд ярьж байна.