ОХУ-дахь АНУ-ын Элчин сайд дипломат ярианд суралцаж эхэлжээ. Учир нь, тэрээр өнгөрсөн долоо хоногт Оросын оюутан залууст лекц унших үеэрээ хошигнолоо хэвтрүүлснээс болж суугаа орныхоо эрх баригчдаас багагүй донго хүртсэн юм. Ноён Элчин сайд Майкл МакФоул оюутнуудтай ярилцаж үеэрээ ОХУ-ыг Киргизэд авлига өгч, тус улсад байрлаж байсан АНУ-ын цэргийн баазаас татгалзуулсан хэмээн ярьсан аж. Түүгээр ч барахгүй АНУ ОХУ-аас 10 дахин бага хэмжээний авлига санал болгосон учраас Киргизийн эрх баригчид өөрийн газар нутаг дээр Америкийн цэргийн баазыг байрлуулахаас татгалзсан гэж өгүүлжээ. Түүний энэ яриа Оросын ихэс дээдсийг ундууцуулж, Гадаад хэргийн яам нь энэ талаар мэдэгдэл хүртэл гаргаад байна. ОХУ-ын Гадаад хэргийн яам АНУ-ын Элчин сайдын хэлсэн үгийг “дипломат ёс зүй, мэргэжлийн хэм хэмжээнд таарахгүй” гээд цаашид хоёр улсын удирдагчдын бодлогын дагуу хэлж ярих үгээ бодож цэгнэж байхыг анхааруулжээ. Кремлийн энэхүү шаардлагад гайхаж буйгаа Элчин сайд нуугаагүй ч цаашид дипломат ёс зүй, үг яриандаа анхаарч суралцах болно гэж мэдэгджээ.