Монголын сагсан бөмбөгийн холбооны “Пепси” дээд лигийн гурван удаагийн аварга, энэ жилийн дэд аварга “Хасын Хүлэгүүд” баг лигийн тэмцээнийг дуусгасан даруйдаа Европыг зорьсон билээ. Бельги, Голланд, Францаар аялан тоглолт хийх төлөвлөгөөтэй явсан тэд одоо эцсийн зогсоол Парист ирээд байгаа аж. “Хасын Хүлэгүүд” Бельгид байхдаа Антиверп Гиантс багийн эсрэг тоглон 80:76-гийн харьцаагаар хожсон байна. Манай сагсан бөмбөгийн түүхэнд ингэж Европт багаараа очиж тоглон, хожил авч байсан удаагүй. Монголд клубийн системд шилжсэн сагсан бөмбөгийн анхны баг болох “Хасын Хүлэгүүд” аялан тоглолтынхоо  хугацаанд  мэргэжлийн хоёр, сонирхогчийн хэд хэдэн багтай тоглох хуваарьтай байгаа юм. Тэр дундаа Голланд , Бельги ,Францад ажиллаж амьдардаг монголчуудынхаа шигшээ багтай тоглох ажээ.
Багийн хамгаалалтын ноён нуруу  болох Кимарли Виллиамс , Чарлес Картер нар нутаг буцсан учир Европт аялан тоглолт хийх тоглогчдынхоо бүрэлдэхүүнд хэд хэдэн өөрчлөлт оруулжээ. Тэд аялан тоглолтын бүрэлдхүүнд багтаагүй, харин М.Бадрах, О.Сэргэлэн, Б.Батжавхлан, О.Чинзоригт, Ц.Азбаяр, С.Өрнүүнбилэг, О.Сайнбаяр, Ш.Сэдбазар, Т.Санчир, Н.Золжаргал, Ү.Давхарбаяр, Отгонмөнх гэсэн тамирчид нь Европт тоглож байна. Аялан тоглолтод “Хасын Хүлэгүүд” багийнхнаас гадна МСБХолбооны шүүгч Туул , Ууганцэцэг нар явж, тоглолтуудыг шүүж байгаа аж.