Олон улсын хөлбөмбөгийн холбооноос тамирчдадаа хандан өвчин намдаагч эм хэтрүүлэн хэрэглэхгүй байхыг санууллаа. Тус холбооны мэргэжилтнүүдийн судалснаар хөлбөмбөгчид өвчин намдаах эмийг хэтэрхий их хэрэглэж байгаа нь цаашид эрүүл мэндэд нь ноцтой үр дагавар учруулж болохуйц хэмжээнд хүрсэн байна. Тухайлбал, 2010 оны хөлбөмбөгийн дэлхийн аварга шалгаруулах тэмцээний үеэр тоглогчдын 40 гаруй хувь нь тоглолт бүрийн өмнө өвчин намдаах ямар нэгэн эм хэрэглэж байсныг судалгаагаар тогтоожээ. Тийм ч учраас Евро-2012-ын өмнө энэ аюултай зуршлаасаа салахыг ФИФА-гаас зориуд хөлбөмбөгчдөд сануулж байгаа нь энэ аж. Хөлбөмбөгчдийн өвчин намдаах эм ихээр хэрэглэдгээс үүссэн гашуун туршлага ч бэлхнээ бий. Хорватын хөлбөмбөгч Иван Класнич бөөр нь хэт өвчилснөөс эрхтэн шилжүүлэх хагалгаанд орсон юм. Тэрээр багийнхаа эмч мэргэжилтнүүдийг өвчнийг нь цаг тухайд нь оношилж чадалгүй, өвчин намдаах эм удаан хугацаагаар уулгаж явснаас бөөр нь муудсан гэж шүүхэд хандаад байна. Өвчин намдаах эмнүүд нь хүний бөөрөнд маш муу байдаг аж.