Муу дээр муухай, муухай дээр улцан гэгчээр Грекийн хотууд мөнгөгүй хоосорсны хажуугаар хогондоо дарагдаж гүйцжээ. Тус улсын эдийн засаг хямарснаас хойш эсэргүүцлийн жагсаал цуглаан бараг өдөр бүр гарах болсон. Олон нийтийн энэ эмх замбараагүй байдлыг даган хог хаягдал ч хаа сайгүй бөөгнөрөх болжээ. Хот тохижолтын ажилтнууд үүргээ гүйцэтгэж, гудамж талбайгаа цэвэрлэж байгаа ч бөөгнөрсөн хур хогийг зайлуулан ачиж явах машин техник нь хүрэлцэхээ больсон байна. Грекийн хоёр дахь том хот Тессалоникид гэхэд ердөө дөрвөн хогны машин л үйлчилгээнд гарч байгаа хогоо зөөж дийлэхээ больжээ. Уг нь, тус хотод хогны 100 орчим машин байдаг ч төсвийг нь танаж, ажилчдыг нь цомхотгосноос хойш ийнхүү бүрэн хүчин чадлынхаа 10 хувьд ч хүрэхгүй машин техник ашиглахад хүрчээ.