Франц улс Афганистанд алба хааж буй цэргүүдээ ирэх сарын эцсээр татаж эхлэхээр бэлтгэж байна. Долдугаар сарын эцэс гэхэд Франц цэргүүдийн түрүүч нь эх орондоо ирсэн байх болно гэж тус улсын Ерөнхийлөгч Франсуа Олланд мэдэгдлээ. Францын цэргүүдийг эх оронд нь буцаана гэсэн мэдээлэлд олон нийт төдийлэн итгэхгүй байсан ч саяхан тус улсын дөрвөн цэрэг амь үрэгдэж, тав нь шархадсаны дараа цэргүүдээ буцаан татах шийдвэр баттай хэрэгжинэ гэдгийг Ерөнхийлөгч ийнхүү нотолжээ.
Афган дахь цэргүүдээ 2012 онд багтааж татах нь Ф.Олландын сонгуулийн хамгийн гол амлалтуудын нэг байсан юм. Харин өмнөх Ерөнхийлөгч Н.Саркози цэргүүдээ 2013 онд татах байр суурьтай байсан.
  Одоо тус улсын 3300 цэрэг Афганд энхийг сахиулж буй бөгөөд 2001 оноос хойш 87 цэргээ алджээ.