Жил бүр уламжлал болгон зохиогддог олимпын залуу судлаачдын цугларалтанд Монголын бейсболын холбооны дэд ерөнхийлөгч Ч.Мөнхсайхан, “Боловсрол суваг” телевизийн сэтгүүлч Б.Онон нар оролцохоор боллоо. Грекийн Олимпия уулын хормойд болдог энэхүү цугларалт 52 дахь удаагаа зохиогдож буй нь энэ юм. Оролцогчид 14 хоногийн турш эртний олимпын наадам явагдаж асан тэр газар цугларч, олимпын талаарх мэдлэг, санал сэтгэгдлээ солилцдог юм. Уг арга хэмжээг Олон улсын олимпын академи зохион байгуулдаг бөгөөд Монголын үндэсний олимпын академи 1999 оноос оролцож эхэлсэн юм.