Норвегийн үндэсний олимпын хороо 2022 оны өвлийн олимпын наадмыг Осло хотод зохион байгуулах хүсэлтэй байгаагаа албан ёсоор мэдэгдлээ. 2022 оны олимпын наадмыг зохион байгуулах эрхийн төлөөх нэр дэвшигчид ирэх жил бүрэн тодрох бөгөөд 2015 онд аль хот авахыг шийдэх билээ. Норвеги улс хамгийн сүүлд 1994 онд өвлийн олимпын наадмыг Лиллехамер хотноо зохион байгуулсан бөгөөд энэ хот нь 2016 оны залуучуудын өвлийн олимпыг мөн хүлээж авах билээ. Осло хот 1956 оны өвлийн олимпыг зохион байгуулж байсан юм.