ОХУ Сирийг бүх төрлийн зэвсэг, тэр дундаа байлдааны онгоцоор хангадаг гэж хардаж байгаагаа АНУ нуусангүй.Тус улсын Төрийн нарийн бичгийн дарга Хиллари Клинтон энэ тухай мэдэгдэл хийхдээ ОХУ-ыг зэвсэг техникээ Сирид нийлүүлэхээ зогсоохыг уриалсан байна. Хиллари Клинтон “Оросоос Сири рүү илгээсэн онгоц энхийн бус зориулалтаар ашиглагдсан гэх мэдээллүүд сүүлийн ед ирэх болсонд бид сэтгэл зовниж байна. Иймд зэвсэг нийлүүлэхээ зогсоохыг хүсч байна” гэж давтан хэлжээ. Гэхдээ АНУ-ын энэ хардлагыг огт үндэслэлгүй гэж Оросын тал эрс үгүйсгэдэг.  Оросын Ерөнхийлөгч Владимир Путин Германы канцлер Ангела Маркелтэй хамт хийсэн хэвлэлийн хурлын үеэр Сирийн мөргөлдөөнд ашигласан зэвсгийг ОХУ нийлүүлээгүй гэж мэдэгдсэн юм.
Сири бол ОХУ-ын зэвсэг нийлүүлэгч гол орнуудын нэг. НҮБ-ын хийсэн судалгаагаар өнгөрсөн оноос хойш Сирид өрнөж буй зэвсэгт мөргөлдөөний хөлд 15000 хүн амь үрэгдсэн тоо гараад байна.