Египетийн Ерөнхийлөгчийн сонгуулийн хоёрдугаар шат өнгөрсөн амралтын хоёр өдөр боллоо.  Ерөнхийлөгчийн сонгуулийн нэгдүгээр шатанд 16 хүн нэр дэвшсэнээс хоёр дахь шатанд экс Ерөнхий сайд Ахмед Шафик, Лалын ахан дүүс хөдөлгөөний удирдагч Мохаммед Морси нар үлдсэн юм. Энэ удаагийн сонгууль бол Хосни Мубаракийн дэглэм нуран унаснаас хойшхи анхны Ерөнхийлөгчийн сонгууль. Тийм ч учраас египетчүүд сонгуульд өндөр ач холбогдол өгч, өөрчлөлтийг хүлээж байгаа. Гэхдээ экс Ерөнхий сайд Ахмед Шафик сонгуульд ялсан тохиолдолд олон нийтийн эсэргүүцлийн хөдөлгөөн гарч болзошгүй. Учир нь, Хосни Мубаракийн үед Засгийн газар тэргүүлж байсан түүнийг төрийн тэргүүн болгох нь хуучин дэглэмээ буцаан тогтоосноос ялгаагүй хэрэг гэж зарим хүн үздэг юм.