Португал Чехийн шигшээ багийг хожиж шөвгийн дөрөвт үлдэж түр санаа амраад байгаа билээ. Тоглолтын нэр төрийн ганц гоолыг хийсэн гол баатар  Криштиан Роналду сэтгэгдлээ хуваалцжээ. “Энэ тоглолтын үр дүн бол биднийг ямар гайхалтай тоглосны гол нотолгоо. Магадгүй эхний 20 минутад бид тогтвортой тоглоогүй боловч үүний дараагаас тоглолтыг дуустал бүх санаачлагыг гартаа авч чадсан. Манай багийхан яриа байхгүй үнэхээр гайхалтай тоглолтыг үзүүлсэн” гэжээ. Португалийн шигшээ “Евро-2012”-д хэр хол явах  бол гэсэн сэтгүүлчийн асуултад “Манай баг тун сайн. Бид олон юманд хүрч чадна. Еврод түрүүлэх боломж бий юу гэвэл 50:50 хувь гэж бодож байна” хэмээн хариулжээ.