Олимпын наадмын хамгийн олон үзэгчтэй спортын төрлийн нэг нь хөнгөн атлетик. “Хаан спорт” гэгддэг тус спортын 100 метрийн төрөлд Бээжингийн олимпын үеэр Ямайкын тамирчин Усайн Болт дэлхийн дээд амжилтыг шинэчлэн тогтоосон билээ. Саяхан болсон Ямайкын “Олимпын сорилго тэмцээн”-д 100 метрийн аварга шалгаруулах гүйлтийн төрөлд Усайн Болт хоёрдугаар байр эзэлжээ. Тус тэмцээнд дэлхийн аварга Иохан Блэйк 9,75 секундын хугацаанд барианд орж алтан медаль хүртсэн байна. Харин хоёр дугаар байрт орсон Усайн Болт 9,86 секунд гүйсэн бол өмнө нь дэлхийн дээд амжилтын эзэн байсан Асафа Пауэл 9,88 секунд гүйж 3 дугаар байрыг эзэлжээ. Блэйкийн энэ удаад гаргасан амжилт нь энэ жилийн хамгийн өндөр үзүүлэлт болж дэлхийн бүх цаг үеийн хамгийн хурдан хүмүүсийн дөрөвдүгээрт жагссан байна. Түүний өмнө Усайн Болт 9,58 секунд, Америкийн тамирчин Тайсон Гэй 9,69 секунд, нутаг нэгт тамирчин Асафа Пауэл 9,72 секунд гэсэн амжилтаар жагсдаг байна.
“Би үүнд ханаж бологүй... бүх зүйл сайн байна. Би зүгээр л азтай байлаа” гэж тэрээр хувийн дээд амжилтаа тогтоосныхоо дараа ярьжээ. Мөн “Би одоо ямайкын үндэсний аварга боллоо. Олимпт ч энэ хэвээрээ оролцох болно” хэмээн сэтгүүлчдэд хуучилсан байна.