Зуны 30 дугаар буюу Лондонгийн олимпод Монголын чөлөөт бөхийн холбооны эмэгтэй тамирчид бүтэн багаараа буюу 48, 55, 63, 72 кг жинд олимпын эрхээ хүртсэн. Уг жингүүдэд 48 кг-д олон улсын хэмжээний мастер Д.Отгонцэцэг, 55 кг-д Ц.Бямбацэрэн,63 кг-д С.Батцэцэг, 72 кг-д Монгол Улсын гавьяат тамирчин О.Бурмааг  олимпод илгээхээр болсоноо тус холбооны зүгээс албан ёсоор зарласан. 63 кг-аас бусад жингүүдэд тамирчид олимпын эрхээ хүртсэнээрээ, мөн сүүлийн сонгон шалгаруулалтад илүү байснаар олимпыг зорих болсон бол 63 кг-ын жинд л тухайн олимпын эрхээ хүртсэн тамирчин нь бус сонгон шалгаруулалтын сүүлийн шийдвэрийг үндэслэж С.Батцэцэгийг явуулахаар болжээ. Туркийн Станбулд хотноо болсон дэлхийн аварга шалгаруулах тэмцээнд О.Насанбурмаа үнэхээр илүү байж хүрэл медаль, Лондонгийн олимпыг зорих тийзээ захиалж чадсан ч  энэ зөвхөн улсад өгч буй эрх. Гэтэл жил бүр уламжлал болгон зохион байгуулагдаж буй “Mongolia open”  мөн улсын аварга шалгаруулах тэмцээн, олон улсын тэмцээн уралдаанд оролцсон үзүүлэлтээр С.Батцэцэг үнэхээр илүү байсан учир тэр олимпын наадмыг зорих болсон байна. Энэ талаар Монголын чөлөөт бөхийн холбооны ерөнхийлөгч Л.Чинбатаас тодруулахад “ Чөлөөт бөхийн олимпын жинд эрх хүртэнэ гэдэг нь тухайн улсад ирж буй эрх. О.Насанбурмаагийн хувьд олимпын эрхээ хүртсэн бол цаашдаа хичээж өөрийн болгох хэрэгтэй байсан. Холбооны удирдлага, багш дасгалжуулагчид нэгэнт гаргасан шийдвэрийг хүндэтгэх л хэрэгтэй.  Одоо үүнийг дахин яриад байх шаардлаггүй” хэмээн хэлсэн юм.