Болотныйн талбайд өнгөрсөн тавдугаар сарын 6-нд болсон жагсаал, эмх замбараагүй байдлын  үеэр баривчлагдаж, саатуулагдсан иргэдийг өмөөрч ирэх 26-нд  жагсаал хийхийг Москва хотын дарга, захиргаа зөвшөөрсөн байна. Энэ талаар “Эв нэгдэл” хөдөлгөөний хамтрагч Илья Яшин өөрийн Твиттертээ бичжээ. Тэрээр блоктоо “Тавдугаар сартын 6-нд болсон жагсаалын үеэр эмх замбараагүй байдал үүсгэсэн хэмээн баривчлагдсан улс төрийн хоригдлуудыг дэмжиж, жагсаал хийхийг эрх баригчид зөвшөөрлөө. Бид долдугаар сарын 26-ны 19,00 цагт тэнд байх болно” гэж бичсэн байна. Жагсаал цуглааныг “Тавдугаар сарын 6-ны хороо” байгууллага зохион байгуулж байгаа бол иргэний хөдөлгөөний хараат бус байгууллагуудын идэвхтнүүд, төрийн бус олон нийтийн болон улс төрийн хөдөлгөөнүүд оролцох юм байна.
“Тавдугаар сарын 6-ны хороо” үүний өмнө долдугаар сарын 26-ныг “Болотныйн хэргээр” буруутгаж баривчлагдсан хүмүүсийн эрхийг хамгаалах эв нэгдлийн өдөр болгон зарласан юм.
Болотныйн талбайд тавдугаар сарын 6-нд болсон жагсаалын үеэр эмх замбараагүй байдал үүсч үүний улмаас эрх баригчид 14 хүнийг буруутгаж, баривчлаад байгаа юм.