Лондон 2012 олимпийн 30 дахь удаагийн тоглолтыг эх орондоо хүлээн авч буй Их Британичууд шөвгийн наймаас хасагдлаа. Тэд Өмнөд Солонгосын багтай шилдэг дөрөвт үлдэхийн тулд тоглосон юм. Үндсэн цаг эхлээд удаагүй байхад Жин Дон Вон тоог нээсэн хэдий ч хариуг нь Их Британины хагас хамгаалагч Аарон Рэмси гоолдож тоог тэнцүүлж чадлаа. Үндсэн цаг болон нэмэлт цагт тэнцээгээр өндөрлөсөн тоглолтын ялагчын хувь заяаг пенальтиар тодруулах болоход “Челси” клубын  Даниел Старриж алдаж багаа хөөдлөө. Ийнхүү Англичууд ээлжит удаагаа том тэмцээндээ азгүйгээр бүдэрэх нь энэ. Харин нутгийн эздийг талбай дээр нь буулгаж авсан Өмнөд Солонгосын шигшээ энэ олимпийн наадамд түрүүлэх магадлал хамгийн өндөр гэгдэж буй Бразилчуудтай тоглоно. Тэдний өрсөлдөгч Бразилчууд Гондурасын багийг 3:2-оор харьцаагаар хожиж шөвгийн дөрөвт шалгарсан юм. Шилдэг наймын өөр нэг тоглолт болох Мексик - Сенегалын тоглолтонд мексикчүүд өрсөлдөгчөө 4:2 харьцаагаар, тэмцээн эхэлсэн өдрөөс л шуугиан тариад буй Япончууд Египетийг 3:0 харьцаагаар буулган тус тус хожиж шөвгийн дөрөвт шалгарлаа. Ингээд хагас шигшээд Мексик-Япон, Бразил-Өмнөд Солонгос гэсэн дөрвөн багийн гал гарсан тулаан болно.