Сагсан бөмбөгийн спорт манай оронд сүүлийн үед хурдацтайгаар хөгжиж, хүүхэд  залуучууд ихээр сонирхох болж хамрах хүрээгээ улам бүр тэлсээр байна. Үүнийгээ дагаад манай тамирчдын тоглох ур чадвар, арга барил өдрөөс өдөрт сайжирч буй. Тэгвэл манай оронд анх удаа Азийн залуучуудын сагсан бөмбөгийн аварга шалгаруулах 22 дахь удаагийн тэмцээнийг Улаанбаатар хотноо зохион байгуулахаар болжээ. Арван хоногийн турш үргэлжлэх уг тэмцээнд 16 орны залуус хурд хүч, авьяас чадвараа сорихоор мэдүүлгээ ирүүлсэн байна. Манай орны хувьд урьдчилсан байдлаар багийн бүрэлдхүүнээ тодруулсан бөгөөд Бээжин хотноо бэлтгэл сургуулилалтаа хийж буй аж.