Туркийн армийн анги, нэгтгэлүүд хуягт, танк, нисдэг тэргийн дэмжлэгтэйгээр Сирийн хилийг давж, курдууд голдуу амьдардаг Жаралблус хотыг эзлээд байгаа тухай мэдээ ирлээ. Press-TV нэртэй Ираны сансрын суваг энэ тухай мэдээлсэн болохоор дэлхийн нийт энэ мэдээнд эргэлзээтэй хандаж байгаа. 

Гэсэн хэдий ч үүнээс өмнө Туркийн засгийн газар Курдын Ажилчдын Намын дайчид орогносон тохиолдолд ямар ч эргэлзээгүйгээр шууд байлдааны ажиллагаа эхлүүлнэ гэдгээ өмнө нь мэдэгдэж байсан. Тэгтэл олон эх сурвалжуудын мэдээнээс үзвэл курдууд нь Сирийн хойд нутагт зүгээр ч нэг үүрлээгүй, өөрийн гэсэн шалган нэвтрүүлэх цэгүүд байгуулж эхэлсэн байна. Тэгэхээр Курдын ажилчдын намтай олон жилийн турш байлдаж байгаа туркууд үүнийг зүгээр хараад суух нь юу л бол.

Хэрэв энэ мэдээ үнэн бол Сирид эрх баригчид : сөрөг хүчин, эрх баригчид : сөрөг хүчин : лалын хэт даврагсад, эрх баригчид : лалын хэт даврагсад : сөрөг хүчин :курдууд : туркийн арми гэсэн гуван ч фронт үүсч байгаа юм. Сири эрх баригчид туркуудтэй шууд тулахаас болгоомжилж байгаа болохоор курдуудыг зэвсэг, шатахуунаар хангах замаар дэмжиж бамбай бариад, Туркийн арми ч сирийн армитай тулах хүсэлгүй байгаа болохоор курдуудтай байлдахын завсар сирид байлдаж байгаа лалын хэт даврагсадыг далдуур зэр зэвсэг, сум, шатахуунаар хангах замаар "чимхээд" ер нь тун ч ээдрээтэй зүйл болж таарлаа.