Камеруны багийн долоон тамирчин Лондонгийн олимпын хотхон дахь байрнаасаа сураггүй алга болжээ. Алга болсон тамирчдын дотор таван боксчин, усанд сэлэлтийн нэг тамирчин , хөл бөмбөгийн нэг тоглогч байгаа аж.  Өнгөрсөн амралтын өдрөөс хойш сураггүй болсон тамирчдыг Их Британиас орогнол хүсэхийн тулд баг тамирчдаасаа салж явсан байх гэж Камеруны багийн ахлагч Дэвид Ожон мэдэгджээ. Камеруны олимпын баг тамирчид 59 хүний бүрэлдэхүүнтэй Лондонд ирснээс 28 нь гэртээ харьж, одоо 24 нь үлдээд байгаагаас ийнхүү долоо нь сураггүй болчихоод байна. Тэдэнд олгосон Их Британийн виз ирэх арваннэгдүгээр сар хүртэл хүчинтэй ажээ.
Камеруны тамирчдаас өмнө Суданы гурван тамирчин тэмцээн уралдаандаа ч оролцоогүй байхдаа сураггүй алга болсон юм. Тэдний нэг нь Их Британиас орогнол хүссэн өргөдлөө аль хэдийнэ гаргаад байгаа бол хоёр нь мөн хүсэлт тавихаар бэлтгэж байгаа гэнэ.