Монголын жүдочдын баярын өдөр өнөөдөр. Жүдоч гэж тодотгосон ч монгол түмний баярын өдөр. Өдгөөгөөс дөрвөн жилийн өмнө урд хөршид болсон дэлхийн спортын их наадмаас Монгол түмэн анхны алтан медалиа гардсан. Зөвхөн жүдогийн холбоо л түүнийг медаль чангаана гэж итгэж байсан. Харин их спортын хувьд Найдангийн Түвшинбаяр битүү морь байлаа. Булган аймгийн Сайхан сумаас бэлтгэлийн хувцсаа үүрээд Улаанбаатар хотод ирж байсан хүү  Бээжингийн олимпод зодоглож,  дэлхийн аваргуудыг төвөггүйхэн ялж, жүдогийн ертөнцөд нэгэн цахиур хагалсан билээ. Монголчуудын хувьд Н.Түвшинбаярын авчирсан алтан медаль 44 жил хүлээсэн их хүлээлтийн цангааг тайлсан юм. Монгол даяараа энэ өдрийг хэрхэн тэмдэглэж байсныг уншигчид мартаагүй буй за.
Жүдогийн -100 кг-ын жин бол Монголынх юм шүү гэдгийг тэрээр энэ удаагийн Лондонгийн олимпод ч бататгаж чадлаа. Наймдугаар сарын 14 гэдэг энэ өдөр үнэхээр Түвшинбаярынх бас жүдогийнх, монгол түмнийх юм шүү.