17-хан насандаа Италийн Миланд зохиогдсон дэлхийн аваргын дэвжээнээ Нямбаярын Төгсцогт хэмээн нэрээ анх дуудуулж байсан хүү олимпод алдраа дуурсгаад өнөөдөр эх орондоо ирлээ. Өөрийн нэрийг дэлхийд дахинаа  таниулахаас гадна эцгийнхээ нэрийг ч өндөрт өргөж яваа Төгсцогт маань хөл нь газар хүрэхгүй баярлаж явна. Хоёр жилийн өмнө дэлхийн аваргаас мөнгөн медаль хүртэж эх орондоо ирчихээд БНСУ-д ажиллаж амьдардаг аавтайгаа утсаар ярин хоолойгоо зангируулж гоморхож суусан билээ. Харин олимпын мөнгөн медаль хүртсэн хүүгээ алс холын Солонгос улсаас аав нь ирж тоссонд боксчин маань ихэд баярлаа биз ээ.