Талийгч Каддаффигийн хамсаатан гэгдсэн 32 хүнийг өнгөрсөн ням гарагт Ливийн нийслэлт Триполи хотноо болсон цуврал алан хядах ажиллагаа явуулсан гэж сэжиглэн баривчилжээ. Ливийн аюулгүй байдлын дээд комиссын нэгэн гишүүн баривчлагдсан хүмүүсийг гэмт хэргийн сүлжээ үүсгэн ажиллаж байсан гэдгийг нотлох баримттайгаар тогтоосон гэж мэдэгдсэн байна.

Ням гарагийн өглөөд Ливийн дотоод хэргийн яамны ойролцоо тэсрэх бодистой машин дэлбэрсэн бол дараагийн дэлбэрэлт эмэгтэйчүүдэд зориулсан цагдаагийн академийн хажууд болжээ. Эдгээр алан хядах ажиллагааны улмаас хоёр хүн амиа алдаж, дөрвөн хүн шархадсан аж.