Хоёр долоо хоногийн өмнө Ангараг гаригийн гадарга дээр газардсан "Кьюриосити" өөрөө явагч төхөөрөмж гаригийн гадаргыг судлахдаа ашиглах лазерын төхөөрөмжөө туршиж үзэв. Дэлхийгээс өгсөн тушаалын дагуу "Кьюриосити" өөрөөсөө 2,5 метрийн зайнд байсан 7 см диаметртэй чулууг лазераар буудан гадаргууг нь хайлуулжээ. Сая гаруй ваттын хүчтэй хэт улаан туяаны импульсээр 10 секундын дотор 30 удаа буудахад чулууны гадарга ууршиж, ууршилтыг "Кьюриосити" нь тусгай дуран авайгаар ажиглан чулууны найрлагад агуулагдаж байгаа химийн бодисуудыг тодорхойлсон байна.

Лазерын төхөөрөмжийг Франц, АНУ-ын мэргэжилтнүүд найман жилийн турш бүтээжээ. "Кьюриосити" өөрөө явагч робот нь Ангараг гарагийн түүхэнд амьд амьтан байж болохоор үе байсан эсэхийг тогтоох зорилготой юм.