Хятадын нөлөө бүхий улс төрч асан Бо Силайн эхнэр Гу Кайлайд Их Британы бизнесменийг хөнөөсөн хэрэгт нь цаазаар авах ял оноожээ. Гэхдээ ялын тогтоолын гүйцэтгэлийг нь хоёр жилээр хойшуулсан цаазаар авах ял. Хоёр жил хойшлуулна гэдэг нь хоёр жилийн хугцаанд Гу Кайлай нь өөр нэг нэг гэмт хэрэг үйлдвэл шууд цаазаар авна гэсэн утгатай ажээ. Харин хоёр жилийн дараа цаазаар авах ялыг бүх насаар нь хорих ялаар сольж таарах байх гэж мэргэжилтнүүд үзэж байна. 

Гу Кайлайн хамсаатан Жан Сяозюнийг есөн жил хорих ялаар шийтгэжээ.

Шүүхээс ял оноосны дараагаар Бээжин дэх Их Британы элчин сайдын яам мэдэгдэл хийж "Хятадын эрх баригчид Нил Хэйвудын үхлийн хэргийг мөрдөн байцаагаад өөсдийн зүгээс буруутай гэж тогтоосон хүмүүсийг нь шийтгэсэн явдлыг бид дэмжиж байна. Энэ хэргийн шүүх ажиллагаа нь хүний эрхийн олон улсын стандартад нийцэхүйц байх, цаазаар авах ялыг хэрэглэхгүй байхыг хүсч байгаагаа бид хятадын эрх баригчдад тууштай ойлгуулсаар ирсэн билээ" гэсэн байна. Харин алагдсан гэх Хэйвудын гэр бүлийг төлөөлсөн өмгөөлөгч нь шүүхийн шийдвэрийг хүндэлж байна гэжээ.