Онц аюултай халдварт өвчин болох боомын тархалт манай хойд хөршийн Алтайн хязгаарт гарсан байна. Алтайн хязгаарын “Дружба” нэртэй тосгонд өнгөрөгч бямба гарагт нэг хүн боомын улмаас нас барж, гурван хүн хүнд байдалтайгаар эмнэлэгт хүргэгджээ. Оросын онц байдлын газар яаралтай арга хэмжээ авч, тосгоныг тойрсон аюулгүй бүс үүсгэн, бүх оршин суугчдыг нь үзлэгт хамруулж, гэрийн тэжээвэр амьтдыг вакцинжуулах ажлыг эхлүүлжээ. Тосгоны орчим дахь эзэнгүй, тэнэмэл амьтдыг бүгдийг нь устгахаар болсон байна.  Шинжилгээ хийсэн мэргэжилтнүүд нь өвчин малаас хүнд халдсан болохыг тогтоосон тул ийм арга хэмжээ авч байгаа ажээ.