АНУ-ын шүүхээс “Samsung” компанийг “Apple”-ийн бүтээгдэхүүнийг хуулбарласан хэмээн үзэж, нэг тэрбум ам.долларын торгууль тавьсны дараа тус компанийн хувьцаа ганцхан өдрийн дотор долоон хувиар уналаа. 2008 оноос хойш “Samsung”-ийн хувьцаа ингэтлээ унаж байсан удаагүй. Шүүхээс “Samsung”-ийн смартфон болон таблет компьютер нь зарим талаараа “Apple”-ийг хуулбарласан гэж үзсэн учраас тус компанийн зарим бараа бүтээгдэхүүний худалдаанд хориг ч тавьж болзошгүй байгаа юм. Энэ болгоомжлолоос үүдэн “Samsung”-ийн орлого ашиг буурна гэсэн таамаг хаа сайгүй тарж, улмаар хөрөнгийн зах зээлд ч нөлөөгөө үзүүлж эхэлсэн нь энэ.
“Apple”-ийн зүгээс хамгийн том өрсөлдөгчийнхөө гол зах зээл болох АНУ-д худалдаа хийх эрхийг нь хүчингүй болгох зорилготой байгаа бөгөөд энэ тухайгаа ирэх сарын 20-нд болох шүүх хурал дээр танилцуулах аж. Тэд “Samsung”-ийн өмнөх үеийн бүтээгдэхүүнээр зогсохгүй шинээр худалдаанд гараад удаагүй, хамгийн гүйлгээ сайтай байгаа Galaxy S3 загварын утсыг ч АНУ-д худалдахыг зогсоох хүсэлтэй байгаа аж. Хэрэв шүүх тэдний гомдол саналыг харгалзан үзвэл “Samsung”-ийн хувьд хүнд цохилт болох юм. Гэвч “Samsung”-ийн зүгээс үүнийг АНУ-ын зах зээлд ганцхан компанийн ноёрхол тогтоох гэсэн оролдлого хэмээн үзэж, давж заалдахаа мэдэгдсэн билээ.