Грекийн нефть тээвэрлэгч “Energy Centurion” хөлгийг Гвинейн буланд Того улсын эргээс холгүй зорчиж  явахад нь үл мэдэгдэх гэмт этгээдүүд халдаж хөлгийн багт явсан Оросын 24 далайчныг баривчилж одсон байна. Дээрэмчид халдах үеэр багийнхан ослын дуудлага өгч амжжээ. Энэ үеэр Того улсын эргийн хамгаалалтынхан тэр орчимд явсан ч хөлгийнхөнд тусламж үзүүлж амжаагүй байна. Тогогийн нийслэл Ломед далайн дээрэмтэй тэмцэх олон улсын бага хурал болж байх үеэр гэгээн цагаан өдөр энэ хэрэг гарчээ. Гвинейн буланд гадаадын хөлгийг дээрэмдэх хэрэг анх удаа ч гарч байгаа юм биш. Энэ сарын эхээр дээрэмчид нефть тээврийн хөлөг барьцаалж, нефтийг нь буулгаж аваад хөлгийг нь буцаан өгч байсан юм. Африкийн баруун  Нигер, хөрш Того, Бениний эрэг орчим нь Сомалийн зүүн эрэгтэй  адил дээрэмчдийн үүрлэдэг аюултай бүс болоод байгаа юм.